新地（016）代理業務部總經理張卓秀敏（張太）堪稱「地產界人肉讀稿機」！
發展商每次推銷新盤，都鍾意擠牙膏式舉行記者會，開盤前搞十幾廿次記者會閒過立秋，希望藉此增加新盤嘅曝光率。通常發展商阿頭都會就當時市況評論幾句，而且有問必答。
不過，新地嘅張太就出晒名似係人肉讀稿機，撇除佢準備好嘅講稿，問佢其他嘢，佢都係答「遲啲話你知」、「唔講得」、「部署中」、「等公關部再覆」。
就好似噚日咁，美國聯儲局終於加息，咁大件事，張太仍然維持一貫作風，問佢點睇加息，佢就係咁話「下次再公佈」，仲重複咗4次咁多，之後又係講番上面嗰幾句口頭襌。查實佢答一句冇乜影響咪得囉，或者畀佢消化下，希望佢下次真係講喇。