天氣終於轉凍，有啲聖誕氣氛，連續搞咗13年、由員工捐款「逼老闆上台」嘅「摩根士丹利董事合唱團」無失場，噚晚喺總部環球貿易廣場（ICC），兼且為服務聽障人士嘅團體「龍耳」籌款。大摩亞太區聯席首席執行官高浩澧帶領超過70名董事總經理（MD）大合唱。
除咗唱歌，廚藝了得嘅同事一樣可以做善事，今個月初，透過大摩內部網上拍賣競投同事親手焗嘅蛋糕，一整個星期每日有3至5款揀。今年有位任職交易部門、非常巧手嘅同事，就整咗個彭博終端機造型嘅蛋糕，粒粒鍵盤都有齊，冇馬虎㗎，不過聽聞呢個蛋糕並唔係Bid到最多善款嘅一個，唔知好唔好食呢？
又唱歌、又整餅，今年大摩一共籌到300萬，開心放假。