民主黨「中區孖寶」許智峯同吳兆康，當選區議員後預告會有創新抗爭手法，呢對孖寶坐言起行，針對中區違法放置垃圾問題，加上傳統投訴方式多年來遭食環漠視，孖寶決定「升級」抗爭。
噚日凌晨3、4時，孖寶同助理殺入中區蘇豪、結志街，親自執違法放置嘅垃圾，繼而喺清晨6點幾直接將垃圾運到食環署總監嘅辦公室，希望食環署高層體會街坊每朝上班前都要先聞垃圾味、與烏蠅曱甴同處嘅滋味。
至早上9時，孖寶終獲安排與總監會面，會後引述當局承諾認真研究派出通宵巡邏隊解決區內垃圾問題，又表明唔會就今次抗議進行票控。孖寶話今次行動係當局逼出嚟，未來會監察政府有冇落實承諾，如果又走數，行動當然要再升級。