阿仙奴呢兩季多番啲球星，又有番啲獎盃，相信槍迷都好高興，但英足總同英格蘭球迷就應該幾失望，因為兵工廠嗰班本土新星越踢越沉，唔通兵工廠搬完球場之後，啲風水唔太利英格蘭球員？
記得三年前，阿仙奴高調同五位英國新星續約，分別有基蘭基比斯、阿歷士張伯倫、艾朗藍斯、贊堅臣、韋舒亞，隔多冇耐仲同禾確特（前）續埋，真係一片明天滿希望、前路由我創嘅感覺。六大新星中，有五個係英格蘭人，相信嗰陣英軍領隊鶴臣都好開心。點知，唔知係鶴臣黑仔定威爾斯好運，三年過去，得藍斯彈起，其他五位英格蘭球員就令人失望。
禾確特已經26歲，講到喺阿仙奴嘅資歷，佢都算得上係老將，但喺小弟嘅印象入面，佢仲係位新星同小將，因為佢除咗快之外，其他方面進步唔太明顯。不過，喺五位兵工廠嘅英格蘭希望入面，佢已經係最對辦嗰一個。韋舒亞就講多都晒氣，踢幾場波就傷幾個月，至於張伯倫，其實小弟幾睇好佢，對佢期望高過禾仔，因為最初睇佢踢波，覺得佢識用腦，傳波同對抗都唔錯。呢排阿仙奴傷兵潮，都諗住佢可以上位，點知反而退步晒。
剩番嘅基比斯同贊堅臣就淪為雞肋，一個做緊蒙利爾嘅後備，另一個借咗去韋斯咸。睇個勢，佢哋都有機會為正選而轉去中型班。除咗呢五大新星，阿仙奴近年仲買咗哥林張伯斯同韋碧克返嚟。韋碧克喺曼聯都威過吓，費格遜曾經為咗用佢而放朗尼喺後備，諗住嚟到阿仙奴可以發圍，點知做咗戴亞比接班人。雖然雲格有心培養呢班英格蘭人，但真係唔知點解冇個掂！
文：咖喱