立法會示威區上星期殺出一批口罩人士，涉嫌縱火炸咗示威區垃圾桶後，噚日議事廳亦突然出現「口罩黨」，莫非又有大事發生？原來唔少議員呢期頻頻「中招」病倒，被迫戴口罩出席會議，當中包括人民力量陳偉業、工黨何秀蘭、工聯會郭偉強、商界廖長江同埋冇病嘅工聯會陳婉嫻（圖）等人。
其中受太太感染而喉嚨痛嘅大嚿，病情最嚴重，佢噚日發言時近乎失聲，連點人數都一度要靠舉「點人數」嘅紙牌代勞。何秀蘭、郭偉強同樣喉嚨不適，兼有幾聲咳，所以都戴咗口罩以免傳染人。廖長江都話患咗感冒，唔知係俾邊個傳染咯。嫻姐點解冇病都加入「口罩黨」？佢話因為前後左右都唔少口罩議員，自己雖然好健康，但小心為上，都係加入呢個新興幫派好啲喎！