一位讀者Thomas來函，指幾年前已有來函講油麻地果欄，想話拆咗佢，將果欄遷移，騰出吉地興建商住大廈，讀者T仲記得當時左丁山認為事件太複雜，難以實行。眨吓眼幾年已過，油麻地果欄紋風不動，呢位讀者認真睇得起左丁山，要求本欄發聲，推動政府做啲嘢。
唔好講笑嘞，當今政府冇人可以推得動，目前頭等大事係明年2016立法會大選，七月後籌備2017特首競選，最重要之事係尋求連任，千祈唔好遇事迎難而上，要盡快撲火，例如新版權條例草案、TSA、高鐵超支延期等等，皆係從大事化小、小事化無嘅角度着手，希望和稀泥式得到立法會通過就算。讀者Thomas話唔講就俾賽馬貼士算了，不要對政府有期望。
正是如此。本人對政府無甚期望，無意亦無力推動政府做乜做物，只鍾意常在馬場講馬講飲食，凡夫俗子何必勉強出頭爭鋒？
講開貼士，星期日國際賽左丁山唔錯得晒，例如引述肥仔K，講明日本馬夠惡，來者不善，果然十匹日本馬參加三場大賽，得2勝1亞1殿，捧走兩隻大盃，威盡一時。可惜左丁山拖唔中，又諗唔到「榮進之光」爆38倍大冷門，賽後只能嘆聲走晒寶。但馬場稀客校友L就贏到笑哈哈，原來佢係日本馬「榮進之光」馬主嘅多年生意朋友，平時唔入場，當日入場就係捧「榮進之光」，乜都唔識買，只買1000元獨贏，1000元位置，收番49,450元，都唔知發生乜嘢事，校友L笑㗎㗎咁走嚟搵左丁山報喜，猛講：「師兄，我請飲茶。呢五萬蚊睇怕要輸四五年先至輸番出去！」「榮進之光」嘅馬主係註冊日本公司，大馬主平井先生育馬養馬無數，名下馬匹皆以「榮進」為名，曾以私人名義在香港做過馬主，但佢嘅香港馬可以講係冇隻得嘅。據肥仔K自日本馬經睇到啲八卦料，跑贏「步步友」嘅「滿樂時」馬主吉田先生以億億聲日圓買馬，亦有用千零萬日圓買馬碰運氣，兩歲過後，佢判斷過話冇乜前途嘅新馬就會轉讓俾太太Kazumi，「滿樂時」就係呢一類，估唔到「滿樂時」係咁贏，由日本贏到香港攞香港盃令吉田太太笑逐顏開，馬場專收叻仔，呢場賽事又係一個例子，如果一千萬港元買一隻馬就實為馬主揚威嘅話，潘蘇通都可以猛咁捧盃啦。