區選塵埃落定，不過花生依然食唔停。花生友今日想分享嘅係建制派爭地盤嘅故事。
話說今屆區選，唔少資深議員都被新丁、素人扳倒，最矚目當然係民建聯鍾樹根喺東區漁灣被徐子見「連根拔起」，民記另一雙料議員葛珮帆喺沙田輸咗卻賴地硬等等。
但唔知大家記唔記得？選舉公佈結果當日，第一個報捷嘅傘兵，係來自觀塘區、屬傘後組織「東九龍社區關注組」嘅黃子健。佢喺樂華北以483票擊敗報稱獨立、實則是隱形建制嘅馮錦源。
工聯會乘機重奪老巢
花生友之前同建制派中人傾開呢個賽果，原本想了解吓傘兵參選對建制派嘅影響、特別係明年立法會部署咁啦，點知對方一開口竟然話，馮錦源輸咗都唔係壞事啫。嘩，點解唔幫自己人㗎？
呢位人士都唔介意同花生友揭開肚皮講真話。佢話現年61歲嘅馮錦源，喺嗰區做咗廿年，但地區表現如何？睇今次結果都估到一二啦，如果做得好，就唔會俾個空降嘅新人一舉擊敗喎！原來工聯會一直有意派人喺嗰區落腳，以鞏固九龍東樁腳，但據聞就俾西環㩒住。呢位知情人士仲話呀，𠵱家黃子健贏咗，反而對工聯會有利，因為大可名正言順派人「重奪」建制老巢喎！
其實類似情況，不論泛民同建制都有所聞，由對家出手換人，先有機會趁機洗牌霸地盤，真係未嘗不是好事喎。
花生友
周二、四刊出