似乎每間名校都有一棵大樹相伴。瑪利諾修院學校2010年斬咗70年歷史、俗稱「鬼樹」嘅南洋杉，皇仁書院上月亦斬咗一棵喺校門附近幾十年嘅石栗樹，惹起學生、校友反彈。
近日掀起立法會「屎」上懸案嘅會計界議員兼皇仁校友梁繼昌，特別就此喺立法會透過書面質詢要求政府解釋。發展局回應話，由於專業園藝公司嘅報告指該石栗樹已壞死至不能救治，對師生同途人構成危險，非斬不可。
皇仁仔Kenneth話，呢棵老樹曾陪伴佢嘅皇仁歲月，見到大樹被斬有點不捨，佢仲專程返母校同僅餘嘅樹幹合照，狀甚傷心（圖）。Kenneth話樹木保育條款早喺70年代已載於地契內，但從政府嘅回應可見，當局冇相關土地嘅樹木統計資料，促當局檢討。