講起九龍塘「唐宮」，大家一定諗起喺兩間唐宅走嚟走去嗰隻小狗Lucky，原來Lucky已經到咗彩虹橋，無緣喺復修嘅新唐宮逍遙地奔走。原本家有四犬嘅唐唐，最近喺一個非牟利嘅動物組織收養咗一隻唐狗（雖然大家可能更想佢領養嘅係狼狗）；有別於現有四隻以食物為名嘅狗仔（Cookies、Cream、Butter、Wasabi），呢位新成員名叫Bounce，可能想佢多啲彈跳力。
新唐宮整咗條走廊貫連兩屋，仲有冷氣好疏乎，但唐唐話呀，Bounce經常離「宮」出走，喺花園走嚟走去，可能因為Bounce以前係流浪狗，歎唔慣冷氣噃。
講番新唐宮，唐唐透露用咗八位數字平整地庫兼裝修間屋，佢對新唐宮極講究，要創新簡潔兼環保亦要有住家feel，喺好多建築團隊中，揀咗一對海外工作嘅年輕建築師幫手，藉此支持香港有創意新生代回流。