立法會噚日再就俗稱「網絡23條」嘅版權修訂條例恢復二讀，經歷過上周流會風波，主責嘅商務及經濟發展局好緊張，全日派出唔少狗仔隊點人數，局長蘇錦樑、副局長梁敬國以及政治助理陳百里，全日不停喺前廳走嚟走去向議員拉票，勢估唔到佢哋連肚皮戰都打埋，訂咗一批蛋撻、雞批同叉燒酥請議員食，雖則「雞批打人牙骹軟」，有啲泛民卻唔領情喎。
公民黨陳家洛上周三一擊即中，任內首次點人數就導致流會，力阻網絡23條二讀；噚日家洛一早返到立法會，準備為反惡法作好準備，點知一入到前廳就見到好多盒寫明係「商務及經濟發展局局長致意」嘅蛋撻同叉燒酥，質疑蘇局長呢個做法好唔妥：「做正經事咪做正經事囉，將蛇齋餅糭帶來立法會前廳，成何體統？我覺得冇需要咁做！」
佢仲話蘇錦樑咁做隨時捉蟲，「分分鐘搞到啲建制派議員掛住食唔捨得行開，咁流會就係佢責任」，而佢自己一定唔食喎。
親自發短訊免甩轆
人民力量陳偉業亦覺呢批拉票蛋撻好「哽」眼，喺facebook留言諷刺指，上周三立法會大會人數不足而流會，單單係民建聯已有五人缺席，「卡片局長（噚日）出到蛋撻、雞批，不知會否成功籠絡民心？」
食得唔好嘥，有網民建議議員「嘢照食，會照流」；亦有網民質疑：「同蛇齋餅糭意義相同」。蘇錦樑噚日仲喺立法會響鐘點人數時親自向議員發短訊箍票，似乎真係一票都不能少。原來蘇局長晚上仲加碼，買咗鳳梨酥、蛋卷同馬仔慰勞議員，局長認真細心「so good」喎。
李八方
mailto:[email protected]