寫呢篇文章之前，小弟先自摑三巴，「啪、啪、啪」，季初阿仙奴只係購入門將施治（圖），雖然戰友仙道彬口口聲聲話呢位捷克門將係冠軍拼圖，不過小弟仍然覺得愛隊阿仙奴最急需係購入前鋒及防中，而且覺得施捷斯尼及奧斯賓拿夠做，不過連日睇住英超門將派膠，好似上周六曼聯迪基亞，角球都可以俾對手直射入網，星期日就輪到利物浦門將米洛列特及熱刺門將洛里斯齊齊派膠，間接令球隊失分，更加肯定一個好門將對球隊嘅幫助。
阿仙奴上仗對阿士東維拉贏2:0，看似輕鬆，但其實踢完奧林比亞高斯嘅歐聯生死大戰，雲格排出同樣11人嘅正選陣容，下半場已經出現體力透支，基本上大部份時間都被維拉圍攻，好彩兵工廠都有「要不是」，施治力挽狂瀾下保住清白身，達成169場不失球場次，平占士紀錄，雖然紀錄大部份喺效力車仔所得，不過今季施治都七場不失，認真厲害。
進攻吸引觀眾，防守先可以贏冠軍，上季車路士成功，好大原因都係防守勁，曼聯其實仲係英超失波最少球隊，不過因為傳媒加球迷壓力，領隊雲高爾要改踢法，先搞到呢排係咁輸。阿仙奴呢幾年進攻都冇咩問題，「銀河唯一」有信心，始終都有一線射手能力，仲有山神同奧斯爾不斷輸送，反而防守唔好，先令球隊呢幾年高不成低不就。
施治係唔係冠軍拼圖就太早講，但級數就肯定世界級，有佢把關後防點都定啲，下周一英超大戰，希望施治又做「要不是」，頂住曼城強攻啦。
文：牽牛