每個香港人平均擁有2.3張信用卡，最多就有超過幾十張。以前，有信用卡乃身份象徵，金卡代表卡主身家不薄。正所謂「一卡傍身，世界通行」，去到邊，攞張卡出來，有錢又有面。來到今天，白金卡一街都係，我們已進入一個Visa Infinite、Ultima，或World MasterCard都越來越多人擁有的時代。要神秘又不是人有我有、真正有頭有面，要數美國運通的Centurion（黑卡）。除咗年費貴唔係一般人可以負擔得起之外，佢所提供嘅專人服務可謂貼心又貼身。聽聞可以搞個邀請100隻不同動物的生日派對、失驚無神興之所至吹雞約埋十個八個良朋好友book架Private Jet或者要蝙蝠俠先可以擁有的巨型遊艇開個私人party。
最近，仲有單極盡搞笑的信用卡事件，話說𠵱家好多智能晶片可以透過NFC直接付款，但就面對可能會有不法之徒用讀卡器盜取金錢嘅風險。
正所謂道高一尺、魔高一丈，有人就想出奇招，只要用超級市場買回來的微波爐錫紙將智能信用卡完全包住就可以絕對防盜，最多用嘅時候才拆開錫紙，咁就萬無一失。然而，NFC的發明理應係為用家帶來更多方便，如此包完又拆、拆完又包，又唔型又麻煩，似乎有點本末倒置。
有些銀行，為求突出，選用特殊物料去做信用卡，如透明、磨砂、金屬、燙金等等。有冇諗過，客戶放唔放你張卡喺銀包，並唔會基於張卡嘅用料，更重要嘅，係在乎真材實料的五大要點：
1）全年優惠夠唔夠多、夠唔夠筍、合作商舖啱唔啱口味；
2）還款期、息口、過期還款及海外簽賬手續費、年費點樣計；
3）儲存積分換到禮品或飛行里數有幾實用、幾多蚊換幾多里；
4）特別禮遇好似航空公司貴賓廳、專車接送、生日有乜禮物、馬會包廂之類；
5）最後先至數到形象、身份、設計等。經營信用卡，正所謂收客容易、留客難，要成為主要信用卡時刻不忘使用就更加難。
講到尾，信用卡並再唔係靠講信用！
文廸晞
mailto:[email protected]