跑馬有時真係好奇妙，嗰頭講緊練馬師姚本輝第四場以「包裝騎士」出擊，卻被雷神接手的姚廐舊部，已轉去蘇保羅的「勝風」擒咗做阿二。轉個頭第五場四班1200米，姚本輝即憑「鑽石巨匠」影相氣走雷神座騎「妙感」勝出，3.3倍大熱掄元，馬兒打開今季勝門，組合獨贏開A1並派17元。
「鑽石巨匠」與「妙感」一樣都係團體馬，呢條團體馬連贏係全場最熱一瓣，只得8.3倍。
「鑽石巨匠」馬主係香港鑽石會賽馬團體，陳慧琳父親陳崇偉係成員之一，陳爸爸上月29日至憑另一團體馬蘇偉賢馬房之「神威福將」敲響今季勝鼓，這晚無疑係錦上添花，18日內兩度拉頭馬。
相反隸屬練馬師高伯新的「妙感」唔多好彩，上仗初出用史卓豐，跑田草1000米直路賽得第二，呢次初跑快活谷換雷神轉戰1200米，受制於12檔後追不及，輸少少再做二奶，始終開唔到齋，馬主團體成員兼馬會副主席周永健，唔可以繼本月初「越感」建功後再度揚威谷草，而高伯新剛周日在沙田三度得亞軍後，亦繼續做阿二。今場三、四名分別為冷門「卡達鷹」同半冷「飛霞」，四重彩派二萬蚊左右。
姚本輝指出「鑽石巨匠」上仗配湛明諾漏閘，可能此子不太熟悉馬性，敗難作準。拼後馬兒狀態沒有低落，早前特意找貝諾華為此馬試谷閘，試得不錯，今仗貝諾華發揮出色，獲勝歸功於騎師。