跑完國際賽，多位騎師停賽，其中開始服刑三個賽日嘅潘頓，喺社交網站上載一杯有熱情果同芒果汁成份嘅雞尾酒，原來潘頓一家已經飛到越南充電，同香港漸凍嘅天氣真係差天同地。
練馬師告東尼憑「幸福指數」捧走香港短途錦標，獲得唔少騎練上前祝賀，不過另一廐主高伯新賽後原來爆seed，大大聲向告仔講咗句"Don't want to talk to you anymore！"(以後唔使旨意再一齊傾偈)」
二人咁大仇口？梗係講笑啦，不過高廄「大運財」跑到一絕，仍然輸畀「幸福指數」屈居亞軍，令到「大運財」連續三年喺香港一哩或香港短途錦標都做二奶，唔失望就假咯。
不過「大運財」同主馬「大印銀紙」可以喺香港一哩錦標入Ｑ，點都算一個驚喜，呢對馬喺季內，仍大把機會爭中短途大賽。至於今屆打吡，高伯新籌碼就唔太多，暫時睇可寄望鞋王Le Saunda老闆李子彬愛駒「看今朝」，隻馬係英國雅士谷2000米三級賽三百週年錦標亞軍，亦贏過英國新市場2000米表列賽賽道錦標，近日已積極操練及試閘，估計好快會報名出賽，即管睇睇高伯新能否威番次。