雖然立法會星期六突然發現疑似「屎」蹤，但無損金融界議員「星爺」吳亮星興致。噚日佢帶住一班金融界人士暢遊立法會，前恒生銀行女大班、創興銀行有限公司副主席兼董事總經理梁高美懿都係鴨仔團成員之一。
現場所見，梁太對立法會大樓非常好奇，行入會議廳時即掹出手機，叫同行團友幫手影相留念。問佢擔唔擔心立法會衞生時，梁太笑謂覺得立法會「好靚」，當然「唔驚」，星爺就幫口話「唔使擔心」，之後入咗立法會宴會廳開飯，用行動說明，對立法會嘅衞生信心十足。
立法會主席曾鈺成就話，秘書處已將相關「屎物」交兩間化驗所化驗，由於要培植細菌，相信周四先有結果。