大摩貴價自購馬嘅威力，大家已見識過，昆士蘭打吡亞軍「明月千里」，喺國際賽日在港初出二班賽，輕鬆爆17倍冷Win彈甩贏，毫無疑問將會係今屆打吡熱門之一。而大摩另一匹打吡棋子，身價比「明月千里」更高，盛傳超過2000萬嘅灰馬「代代為王」，6月喺英國聖詹姆士皇宮錦標得季軍，潛質毋須懷疑，不過暫時進度似乎冇「明月千里」咁好喎！
點解咁講呢？「代代為王」脾氣都幾大吓，仲未太適應香港環境。這日由助手前騎師王志偉，準備騎往大圈出跳時，隻馬搞對抗，企定定唔郁，唔願落隧道去大圈，仲發晒脾氣，自行掉頭返馬房，搞到王志偉好無奈，大叫一聲「救命呀！」並爆粗以作宣洩。
搞咗一輪「代代為王」仍未就範，於是轉咗一位外籍助手策騎，不過隻馬仍然好大脾氣，試圖掙扎希望返馬房，睇嚟「代代為王」真係好黐家。不過該外籍助手始終較經驗豐富，最後「代代為王」肯落隧道，去大圈拍跳三段。
其實「代代為王」日前曾由雷神試閘，全程走勢好暢順好乖，冇乜整蠱做怪，睇嚟佢都係受硬唔受軟嘅馬，最叻就蝦一啲小將。