都說香港上市公司嘅選擇多，嫌公用、銀行、地產股太普通，可以選擇墓園、夜場、當舖、放數股，新近仲有假牙股㖭，認真千奇百趣。
義齒器材供應商現代牙科（3600）噚日首日掛牌，公司送贈假牙畀港交所（388）做紀念品，可謂毫無懸念。公司主席陳冠峰與行政總裁魏聖堅送出一大一細假牙，細嗰隻係公司嘅產品，係一隻真嘅全瓷假牙，旁邊大嗰隻，係用3D技術製造嘅假牙模型，由港交所上市委員會委員嚴玉瑜代收。
陳、魏二人做假牙就容易，但想佢哋幫手鑲牙就唔得喇，皆因佢哋並唔係牙醫，只係做牙醫生意啫。
公司喺深圳設廠，魏聖堅早前提過，上市集資，希望可以喺東莞起多個廠。照佢咁講，假牙生意真係好有錢途，不過華華就選擇愛護牙齒了。