這天馬會在跑馬地馬場，舉行《好運1月1賽馬日》記招，公佈2016年元旦日賽事詳情，除了藝人張繼聰和陳凱琳外，三位年輕小鮮肉騎師梁家俊、史卓豐及黃皓楠均有出席，其中史卓豐老竇史科菲亦有撐場，豐豐喺老竇身邊周身郁，霎時間真係成個細路仔咁！
記招會上各位嘉賓都客串做model，穿上馬會「LUCKY START」一系列精品服飾，全部會喺元旦日馬場內有售。
其後陳凱琳接受訪問，她說：「2016年初會有少少假期，希望去旅行吸收多啲，令自己拍戲亦多啲層次。」
梁家俊同陳凱琳同台接受訪問，見到靚女家俊冇眼甘甘，反而大晒幸福，話自己同女友阿Kit「曾經喺日本求咗個小福袋，之後每次跑馬都會帶入場，呢幾年都為我帶來好運。」
記者會上梁家俊更喺大屏幕，首次公開了他同阿Kit在韓國影的結婚相，陳凱琳大讚阿Kit好靚。家俊仔表示現時專心一致策騎，盡力爭取好成績，馬季煞科後才結婚。
至於史卓豐就即場展示佢嘅幸運馬鞭，並透露父親不時提點他要謙虛和努力工作，而豐豐表示已為自己定下目標，就是今季力爭45至50場頭馬。黃皓楠就表示平日都有帶一個家人畀佢嘅小飾物旁身，希望陣上平安。