曾經喺恒隆地產（101）同碧桂園（2007）工作嘅伍綺琴，似乎遇到伯樂喎。佢舊年初離開碧桂園，休息一輪，今年7月底去咗謝瑞麟（417）做掌櫃，半年未夠，公司噚日宣佈，即日起，升佢做執行董事兼副主席，個位仲係新增嘅，照咁睇，佢應該深得老闆娘謝邱安儀信任。
58歲嘅伍綺琴過咗去謝瑞麟返工肯定開心咗好多，事關每次見佢出席謝瑞麟活動，佢都會悉心打扮，明顯係化咗個靚妝，又戴上唔少首飾。
雖然謝瑞麟市值只係得4.8億元，相對佢以前做過嘅恒隆地產與碧桂園，分別有781億元與666億元市場，相差十分之遠，加上𠵱家零售市道麻麻哋，生意都好難做。
但係伍綺琴轉工後，望落比以前醒神好多，從呢個角度去睇，轉咗做呢份工肯定係好事，女人最緊要靚吖嘛，𠵱家仲升埋職㖭。