港大建築學院師生最近去前鯉魚門軍營、即鯉魚門度假村實地考察，無意中喺草叢踢到嚿石，做過英國皇家海軍陸戰隊嘅港大博士戴偉思經研究鑑別，認定係維多利亞時代、本港最古老界石。
佢話界石上嘅B.0.No.4係Board of Ordnance 4號標柱，係前英軍專責測量同繪圖嘅單位，經鑑別後認定係英國皇家工程師歌連臣中尉1843年底或1844年初豎立。1941年日軍轟炸軍營，嚿石無完全炸毀，屹立至今172年，建議列為一級歷史保育文物。
港大建築文物保護課程學部副教授李浩然話，過去軍事用途界石，其實同經緯儀定位嘅三角測量站冇分別，可用來製作地圖，對城市發展作出貢獻。大部份國家或地區都會保育戰爭遺蹟，但香港回歸後帶有殖民地色彩嘅文物，反而得唔到重視保育囉。
戴偉思又帶八方去赤柱舂坎角沙灘燒烤場，原來樹叢入邊有個荒廢碉堡，沙灘旁仲有個機關槍陣地。原來呢兩件設施早於1933年已設置。