曼聯傷兵一大籮，隊長朗尼唞緊，得番安東尼馬迪爾一個前鋒，所以英國傳媒披露，紅魔想召番外借英冠白禮頓嘅占士威爾遜。威爾遜俾曼聯借佢出去，而佢近兩場英冠都有入波，但講真，曼聯進攻嘅問題唔係召個小將返嚟就搞得掂。另外，曼聯下年喺歐霸盃32強會對丹麥嘅米迪蘭特，球會都知呢場波冇乜吸引力，所以票價會比平時歐聯嘅平25%，同埋放寬畀季票持有人唔需要硬性睇呢場波。