呢期吳業坤人氣急升，即惹來是非纏身，噚日有雜誌公開一批私人party相，好明顯見到坤哥樂在其中，而地點正係曾自認吸毒嘅藍潔瑛好友Winnie Yuen屋企。報道仲話一班參與嘅人用非法K盒唱K。坤哥噚日同陳凱彤一齊到商台做訪問時話：「只係普通朋友聚餐，冇諗過飲可樂英姿會上封面。」
涉用非法K盒
坤哥話同Winnie係透過朋友認識，對方亦冇介紹任何大陸登台工作，並冇利益往來。講到飲酒面紅紅，佢話：「我只係飲咗少少，同埋我飲酒都唔會面紅，可能燈光問題。」坤哥話自己唔會逐個朋友背景身份去考究，至於用非法K盒，佢話事前都冇研究係合法定非法，若有任何問題，願意負責任。對於被指不時向女性噓寒問暖，身旁嘅陳凱彤就話冇收過，不過坤哥都承認有時對異性係講多咗說話。
坤哥做完訪問之後就同女助手去深水埗食豬膶麵，其間有粉絲認出佢要求合照，坤哥都有求必應。食完麵佢落咗黃金商場睇電腦遊戲，但行咗一輪就走咗。
撰文：馮仁昭