美國同性婚姻合法化後，唔同界別都有同志出櫃。月初被帝王後衞朗度（Rajon Rondo）鬧係「XX基佬」嘅老牌球證堅尼地（Bill Kennedy），周一公開同志身份，成為第一位出櫃嘅NBA男球證。
堅尼地周一接受美國雅虎訪問，公開自己嘅性取向，呢位執法NBA 18載嘅球證話：「我好驕傲成為一位NBA球證，亦好驕傲做一個同性戀者。」佢就冇視自己為同性戀先鋒，好謙虛咁話只係跟隨其他出櫃人士嘅步伐，而且希望畀訊息年輕一輩，唔好因為性取向而感到羞恥。NBA總裁阿當施華（Adam Silver）都出聲支持：「佢喺NBA嘅18年執法歷史，充滿激情同感染力，冇其他嘢影響到佢執法。」
堅尼地冇公開出櫃原因，但唔多唔少都因為朗度。話說12月5日帝王喺墨西哥城對塞爾特人嘅常規賽，堅尼地連罰朗度兩個技犯，趕佢出場，朗度就好嬲咁用粗口講：「You're a fxxking faggot, Billy.（比利，你係XX基佬）」朗度事後被追加無薪停賽一場，而佢都公開向堅尼地道歉。
其實堅尼地唔係第一位出櫃嘅NBA球證，女球證維奧列特（Violet Palmer）上年已經出櫃，仲計劃緊同女朋友結婚，另外前網隊、巫師中鋒積遜哥連斯（Jason Collins）就係NBA首位出櫃嘅球員。
