政界一直陽盛陰衰，單睇梁班子，由特首、三司到十三局局長，竟然得「局長奶媽」、即政務司司長林鄭月娥一位女士。相反各大政黨，雖然核心領導係男性比例佔多，但掌舵嘅女士卻越來越多，尤其係泛民主派，幾個大政黨都係女性揸fit做主席，睇嚟喺推動性別觀點主流化方面，政黨做得出色過政府好多。
就等八方同大家數一數。嗱，工黨日前改選，胡穗珊以35歲之齡成為本港最年輕嘅政黨女主席；而本身係新婦女協進會計劃統籌嘅胡穗珊，更加係另一個政黨女主席、人民力量袁彌明嘅中學書友仔。而民主黨同公民黨嘅主席，分別喺劉慧卿、余若薇，喺立法會至少有兩個議席嘅四大泛民政黨，都係女性出任主席。
建制有 李慧琼 葉劉
就連建制陣營，都有唔少女性做當家。民建聯主席係李慧琼、新民黨主席則係葉劉淑儀，工聯會冇主席但有會長，都係女士嚟㗎，就係林淑儀，難怪呢片女士揸fit熱潮，引起政界熱議，唔少人拍手大讚，女士能頂半邊天。
八方問過卿姐點睇？佢話更多女性參政、並出任主席要職，當然係好事啦，仲笑言民主黨下屆改選，都要推個後生女做主席喇！唔知社民連、民協同街工等，幾時又會有女話事人出現？
李八方
mailto:[email protected]