利物浦近排走勢回落，周日英超喺主場迎戰西布朗，要靠後備入替嘅奧歷治去到補時六分鐘入波，先以2:2驚險逼和對手。完場後，領隊高路普半拉半扯拉埋班球員手拖手一字排開，向看台上班球迷致謝，將德國風味帶嚟晏菲路。有班刻薄網民仲揶揄紅軍喺主場失分畀西布朗，仲可以咁開心，唔講仲以為贏咗波。
補時六分鐘逼和西布朗
利物浦迎戰西布朗，由傷癒後首次喺英超正選上陣嘅佐敦軒達臣先開紀錄，不過之後形勢逆轉，西布朗先喺30分鐘由奇治戴臣扳平，莊拿斯奧臣之後喺73分鐘建功將比數反超前。踢到補時就夠六分鐘，後備入替的奧歷治喺禁區外推進，俾對手踢跌再起身射門，結果省中人入網，幫紅軍扳平執番一分，高路普就梗係興奮到爆啦。
以往英超比賽完場之後，球員循例向隊友同埋對手道賀之後，都會直接返更衣室。今場波賽後高路普就叫班球員唔好走住，一字排開手拖手向看台上嘅球迷致謝。呢家嘢以往高路普喺德甲就玩得多，不過喺利物浦似乎有部份球員唔多受落，好似企高路普隔籬嘅佐敦伊比咁，見佢都係求求其其郁下手就算數。
洛夫雲傷出高路普勁嬲
紅軍呢個做法，喺網上都有唔少人討論。有球迷喺紅軍官方twitter度笑佢哋，有人認為只係逼和實力一般嘅西布朗，唔使搞咁多嘢啩。當然亦有人有唔同睇法，覺得高路普唔係慶祝和波，而係尊重紅軍球迷嘅表現。利物浦《回音報》社交傳媒編輯巴特利話：「高路普畀紅軍球迷一個明確訊息，希望佢哋可以喺比賽由頭到尾都保持到氣氛，而我亦覺得呢場波氣氛真係一流。」紅軍早前喺主場輸畀水晶宮，高帥賽後不滿有啲球迷提早離場，今場波總算證明到，肯留到最後會有嘢睇。
紅軍今場和波兼又折將，近排表現唔錯嘅洛夫雲，畀格力加特拿踢傷膝頭要退下火線，要等詳細檢查先知道傷情，搞到高路普好嬲，同對方主帥普利斯嘈交。
