公民黨湯家驊辭任立法會議員後，佢原有嘅新東議席喺明年2月28日舉行補選。泛民政黨一早開晒聲，支持公民黨派出楊岳橋出戰，始終個位原本都係公民黨嘅；至於建制派，一直唔多聲氣，暫時似乎只有西貢區議員方國珊表咗態話考慮吓。
查實自由黨早前斟過沙田區議員龐愛蘭過檔兼出征新東補選，但對方say no，因此以為自由黨喺新東補選no show？榮譽主席田北俊用行動話畀大家聽：No！田少今個聖誕節會帶孫仔孫女外遊滑雪，離港滑雪前夕，佢特別帶黨友李鎮強去大埔墟街市，同街坊拜個超早年。李鎮強明明係東區區議員，點解田少帶住佢去大埔出巡？係咪為新東補選霸位造勢？聰明嘅讀者，相信心中有數。