除咗利物浦，兩支倫敦球隊阿仙奴同埋熱刺亦都喺周日有比賽，但際遇就好唔同，兵工廠憑基奧特同埋艾朗藍斯嘅入球，以2:0輕取主場嘅維拉，但熱刺就喺主場俾紐卡素「反吸」，輸1:2，呢場仲係熱刺繼開鑼戰之後，第二場聯賽敗仗㖭！
不過離開咗球場，其實大家都係朋友，喺賽後阿仙奴嘅球員，就拉隊到倫敦著名夜店Libertine開聖誕P，而同場嘅竟然仲有一眾熱刺嘅球員。
喺出席聖誕P嘅兵工廠球員中，奧斯爾、禾確特同韋碧克都打扮得身光頸靚，係梅迪薩卡就隨便啲，牛仔褲加有帽外套。不過，阿歷斯山齊士就貫徹佢住家男人嘅形象，寧願留喺屋企同狗狗慶祝。除咗阿仙奴同熱刺球員外，維拉嘅艾邦拉荷、愛華頓嘅艾朗連儂同埋利物浦嘅尼達利基尼都獲邀出席，其中基尼就搶晒鏡，因為有個疑似係佢女伴嘅靚女，身上少布到不得了！