聖誕節就到，零售業叫苦連天，皆因內地旅客確實少咗好多，生意淡薄，呢個冬天當然唔多好過。查實之前唔少政黨都一窩蜂，拋出各式開放自由行嘅方案，以便喺一簽多行計劃縮水後，招攬高消費客幫補吓，點知一輪熱潮後，議題又開始冷卻落嚟。到底係政黨三分鐘熱度，抑或中央堅持唔肯開綠燈？
等花生友幫大家翻吓各大政黨嘅舊賬先。嗱，經民聯就曾經建議，不如畀內地約2,000萬電子護照持有人，可以喺網上申請嚟港，既方便又快捷；新民黨就倡議過喺配額下，開放更多一線城巿自由行。
「睇吓香港乖唔乖先」
心水清嘅政界中人留意到，兩個黨提建議都幾高調，覺得中央一定會派番少少糖。吖，點知明年將至，都未見有好消息出現，而明明零售業叫緊救命，點算？花生友都打探過，獲回覆係老生常談嗰一句：「梗係要睇吓香港乖唔乖先！」查實冇咗佔中，鳩嗚都係零星出現，應該冇乜大問題啩？據聞阿爺卻唔係咁睇，話君不見反水貨客、港獨等思潮仍然持續喎。知情人士亦話，由於啱啱先因應港情調整一簽多行，無理由呢邊收窄咗、嗰邊又擴大番，有啲矛盾咁囉，所以北京暫時相信都係靜觀其變。
有業內人士話，咪以為𠵱家就係零售業寒冬，明年4月後更大鑊，皆因最後一批一簽多行嘅簽注限期4月屆滿。咁若然明年3月兩會期間，人大政協北上時落吓嘴頭，又有冇生機？呢位業內人士都唔多樂觀，但政治一天都嫌長，到時至算啦。
花生友
周二、四刊出