抽水呃like谷宣傳，是常識吧？九巴都係咁話！九巴fb專頁食住時下嘅網絡23條熱潮，乘勢抽水，將一張製圖（上圖）上載至專頁，話周六起過海嘅108號線服務範圍將「家」強服務，九龍區總站延長至九龍灣（啟業），更增停九龍城（舊機場）、新蒲崗同啟德，班次服務時間亦會延長同加密。特別之處係，張圖入面有人唱緊歌，以及寫住「I Love You」嘅字囉。
嗱，特首梁振英早前同官員喺經民聯晚宴翻唱《喜歡你》，將唱歌片段上載至facebook後惹嚟犯法之嫌，而晚宴上黃家強同CY嘅selfie被上載fb亦惹全城關注，估唔到九巴咁大膽，敢向CY惡搞。有網民讚九巴抽得靚，仲建議增設689號線；另有網民唔知認真定講笑，話會舉報「九巴網絡欺凌」。