34歲嘅美國網球好手「細威」莎蓮娜，周日喺邁阿密舉辦咗一個慈善長跑活動，幫佢嘅「莎蓮娜威廉絲基金會」籌款。作為搞手嘅細威梗係一齊跑啦，但有人發現佢淨係跑咗兩公里，之後就走咗去搭的士到終點，咁做好似冇乜體育精神喎！
細威今次喺邁阿密舉辦嘅慈善長跑，分咗五公里、10公里同兒童組三個組別，吸引到3,000人參加，就連佢家姐「大威」威廉絲同前熱火球員阿倫（Ray Allen）都係其中一分子。大家見細威着到成身「一剔」跑步裝咁出現，實以為佢好勁啦；點知參加咗五公里組別嘅細威，唔知係咪體能太差，跑頭兩公里嗰陣仲笑容滿面，點知跑跑吓就變到面青青咁，最後竟然走咗去搭的士到終點，真係當正自己係搞手就可以唔守規矩。雖然大威近年喺網球場上嘅表現冇細威咁好，但35歲嘅大威今次就跑晒全程，叻過細妹一次。
自拍補飛：下年一定跑完
細威事後可能知衰，就即刻上載咗自拍片段去fb補鑊話：「我今年冇跑足全程，但我下年一定會跑得完㗎喇。」雖然冇人知細威點解會跑跑吓走咗去搭的士，但有網民幫細威解畫，話佢可能因傷先至咁做。呢個解釋都合理嘅，因為細威嘅膝頭同手踭喺今年都傷過，而分別喺10月同11月舉行嘅中國網球公開賽同WTA年終賽，佢都退出冇打。
