【網絡23條】
【本報訊】版權大聯盟日前晒冷開記招撐版權條例修訂草案，卻因場外爭執而腰斬，大聯盟發言人林旭華頓成眾矢之的。林昨日向《蘋果》強調，草案新增六大豁免的寬鬆程度「超英趕美」，又不滿網民「要脅」業界及立法會議員。林聲言業界寧願一拍兩散，也不接受泛民提出開放式豁免的修正案。
記者：白 琳
林旭華昨午接受本報訪問時質疑，草案由諮詢至今拖拉10年，問題癥結在於政府早期放軟手腳，未能引起公眾關注。政府曾就古惑天皇案同時控以不誠實使用電腦及刑事侵權，林指坊間誤會政府日後或向涉嫌侵權者同告兩罪。
「話唔信政府咁冇得講」
不過，他指政府已表明日後就侵權案執法時只會使用版權條例，「如果大家都話唔信政府，咁冇得講啦，乜都唔使做，我哋唔使交稅」。
林強調，本港草案的豁免並不落後，美國的公平使用也不一定較香港寬鬆，因沒清晰列明豁免範圍，反而有更多訴訟；英國明文規定的豁免只有戲仿，本港卻有六大新增豁免，「嗰6項係我哋讓出嚟，仲話少？人哋投資一億製作一套電影、唱片，都要保障合理回報」。
網上有傳新人在婚宴播歌或被告侵權，林旭華澄清，酒樓一般與版權人簽訂版稅合約，「如果冇做，係追究酒樓，唔係追究個人」。本港業界更從未追究認真翻唱者，林反指若歌藝了得或被發掘成為歌手。他也不認同草案向業界傾斜而犧牲市民的言論自由，「你去唱人隻歌，同言論自由有乜關係？冇關係㗎喎。攞人哋啲圖片、片段，去模仿諷刺，全部畀晒你哋（豁免）啦，點解話冇保障？」
他又點名批評資訊科技界議員莫乃光，「佢最清楚雙方面論點，居然喺最後階段走咗去對面。呢個朋友，我好失望」。
記者問泛民修正案如何阻礙政府打擊大規模侵權，林則稱修正案牽連甚廣，須凝聚社會共識，「佢哋有3樣嘢，咁我都有30樣嘢，係咪因為咁冇休止，落後咗10幾年嘅版權條例唔改得？所以我哋另一態度係，一拍兩散囉，算啦，由得佢，要舊法例啦」。
「有人被控唔好賴我哋」
他再三強調，現有版權條例對言論自由的保障較草案更不足，「如果係舊法例，有人因為冇咗6項豁免而俾人告，就唔好賴我哋囉」。
林旭華日前代表大聯盟腰斬記招後，遭網民翻舊賬，指林身為D100網台台長曾批評政府拒絕網媒採訪，該台又曾被香港電台控以侵權，最終雙方和解。鄭經翰昨晚公告，林的角色及立場與該台反對草案的立場不一致，林將暫停主持該台節目。