立法會日前「屎」無前例出現另類「恐襲」，極有可能成為歷「屎」懸案，皆因連平時頭腦精明嘅立法會主席曾鈺成都話呀，事件極不合理兼不合邏輯，就算出動偵探，都未必查明所以喎。
會計界議員梁繼昌上周末喺立法會會議室二開會時，一坐低就「揦屎上身」，發現張枱有便便，名牌衫褲都中招。邊個咁大整蠱？唔少議員都想知，皆因唔想成為下個受害人，事實上有人都質疑，立法會保安係咪有漏洞？竟然有人可以神不知鬼不覺情況下「加料」？所以秘書處都嚴肅處理，撿走便便去化驗，曾鈺成噚日透露，至今仲未有化驗結果，但笑言，搵大偵探都好難查喎。
因乜解究出動大偵探都冇符？曾鈺成話喎，梁繼昌一投訴中招，職員已經用火酒將個位清潔到乾乾淨淨，點追查喎？至於有議員話係梁繼昌自己踩屎冇為意，曾鈺成笑言：「到目前為止，我未聽到合理嘅解釋。」
座位冇人郁過
其實曾鈺成都話啦，立法會會議室一向會鎖門，而會議室二更係較少用到，而秘書處話到明，即使唔開會時，閉路電視依然運作，點知都影唔到道門有被開過、亦唔見有人出入喎，就連疑似有屎嘅位置，張凳都冇郁過，所以真係唔合理兼不合邏輯。吓，唔通係超自然現象？曾鈺成聽完只係哈哈大笑。
李八方
mailto:[email protected]