出爐視帝黃秋生昨日在觀塘為舞台劇《狂揪夫妻》綵排，拍檔蘇玉華、潘燦良和甄詠蓓帶齊紙炮、香檳為他慶祝。秋生攞齊視帝、影帝和舞台劇劇帝，他說：「冇諗過三元及第咁巴閉。」
對於羅家英在微博留言戥阿姐汪明荃不值，秋生認同要給新人機會，還以賽跑作比喻：「若前輩喺前面慢行，後面嘅人就唔敢跑過佢頭。阿姐胸襟好闊，唔需要用呢啲證明佢地位，絲毫無損。」可覺陳展鵬黑面？他笑說：「係咩？我以為佢一向咁cool。佢都好得體，有上前恭喜我。」此外，前晚秋生領獎時在台上感慨梅艷芳遺物被拍賣，他說：「先唔講佢係一個貢獻咁大嘅人，就算普通女人，我哋都唔應該拍賣佢嘅內衣。」
採訪：馬建華
攝影：仇志德