香港藝術館雖然8月起閉館3年準備擴建，但唔等於同市民零接觸，皆因佢哋舉辦、以「變．新」為主題嘅「藝術館出動！」教育外展計劃，就派出藝術教育專車逢周一至五駛入校園，周末同日就停駐公共場所，拉近市民同藝術嘅距離。
原來藝術館設計咗4隻代表重要藏品嘅吉祥物坐鎮。外表雪白似青花瓷，一睇就知代表中國文物，叫「古仔」；色彩繽紛嘅「阿港」就代表香港藝術；頭頂黑漆漆似一滴墨水嘅就係代表中國書畫嘅「阿墨」；身上印有帆船圖案嘅「油油」就代表歷史繪畫嘞。
八方聽聞4隻吉祥物獲學生哥like爆，有學生仲發揮創意，將維港景色畫喺白雪雪嘅「阿港」身上㖭呀。