四大國際賽從來壁壘分明，這天第四場香港瓶開出外隊四重彩，第五場1200米香港短途錦標，則再見證主隊強勢，當中由雷神操刀的落飛次熱門，告東尼馬房之「幸福指數」14檔起步，火速埋欄，就此一放而回，收復上屆同一賽事屈居亞軍之失，人馬卒之首度合作贏馬，單Win有4.4倍，組合獨贏3揀1開A1派12.5元，勝出地區開C1派10.1元。
雷神首次勝出香港短途錦標，「幸福指數」亦是他在港第300場頭馬，目前佢除香港瓶外，其餘三項國際賽都已經贏過。
今場二至四名由「大運財」、「新力風」及「誰可拼」分別取得，呢條主隊四重彩派7,471元，當中「大運財」係大熱，對上兩季皆於香港一哩錦標屈居亞軍，今季縮程跑1200米都係唔掂，變成連續三季在同一日子做二奶。
「幸福指數」今場獲獎金1,054萬，連同今年遠征杜拜跑第二在內，來港後19戰7勝8位，總獎金一躍而至超過2,800萬元，馬主黃凱汶可謂大豐收，賽前幾日同主的「幸福加數」由告東尼轉投呂健威，一度傳言四起，好在始終冇影響軍心。而告東尼繼2004年「精英大師」後，相隔11年重奪香港短途錦標。
今場「新力風」配布文得季軍，韋達夥拍卡士較低的「誰可拼」跑第四算有交代。客軍在今屆香港短途錦標全軍覆沒，名次最高係蒙古團隊的「蒙古週末」，跑第五幫馬主攞到61萬獎金。