立法會因為網絡23條而喺周三大會展開新一輪拉布戰，反而逢周五舉行嘅財委會喺通過咗創科局撥款後，暫時可以唞唞。
唔使喺周末前夕嘅Happy Friday加班趕工喎，梗係開心啦，而新民黨田北辰對周五更加特別有期待，皆因佢嘅外孫女會「接放工」，身為公公嘅二少，通常會喺財委會完咗後「再開工」，抱住心肝椗周圍「視察」市道。好似上周五立法會財委會完咗之後，二少就抱住外孫女（圖），巡遊中環同金鐘等商場，睇聖誕樹同觀賞燈飾，享天倫之樂。二少仲話喎，其間有反覆思考，如果同外孫女唱聖誕歌兼放上網，算唔算違反版權修訂條例？結果係：「說笑啦，當然不會啦！」