香港政局之所以令人厭惡，係一班業餘政客亂搞一通，連以前班局長都睇唔過眼。吳克儉做咗三年半仲未識做局長，肯定係政府內部管治出了大問題。ＴＳＡ爭議本屬政策執行出現偏差，如果孫明揚做局長年代，未鬧大就已經同教協、大型辦學團體摸底，用政策及政治手段令學校就範取消操練，拆彈過程低調、快速。這種手法乃港英年代政務官訓練，目標為本，唔會政治掛帥，因為他們知道政府決策沒有公眾授權，認受性來自「政通人和」。
誤判形勢令局面不可收拾
吳克儉之所以後知後覺，並非佢智商特別低，因為即使佢IQ零蛋，每日政府早禱會上，各司局長都會討論要應對的事項，由政務司司長去責成執行。ＴＳＡ一開始就被定性為泛民區選政治議題，所以班官先可以寸爆，視而不見，理得班家長嘈到拆天，費事益泛民，睬你都儍。亦因此令吳克儉更加肆無忌憚，因為後面有人撐腰，以「私人理由」去日本賞紅葉、食放題、睇制服學生，都唔出席立法會公聽會。但ＴＳＡ在中產父母眼中係苛政，根本同泛民區選冇關，相反泛民借ＴＳＡ抽水就真。而公眾眼中見到就係一個尸位素餐，月𢭃三十多萬而不理學生死活的問責局長。到形勢惡化，連建制派議員也受壓，李慧琼被指摘推個女落火坑，民建聯「做媒」女學生被踢爆後，先至諗計拆彈。𠵱家由局長出信畀學校，警告要取消聖誕及新年假期補課操練，就更加可笑。
一個問責官員要思考的政治問題，係ＴＳＡ終局想點，如果End Game未諗通，就忽然扮勇武，好容易出事。如果最終係作微調，改為抽樣、或評分不公佈而非撤銷，就要管理好公眾期望。第二個問題係以局長權威去壓學校，小心適得其反，一來局長根本就冇權威可言，假期後學校照樣操練，或陽奉陰違，傳媒總會找到個案，證明局長無能。正確做法應該同時宣佈暫停一年，等候檢討結果。𠵱家半桶水，兩頭唔到岸。
同樣蘇錦樑處理網絡23條，所犯錯誤一模一樣，先係傲慢，又誤以為屬泛民玩嘢行為，到市民逼到泛民議員集體拉布，先至認真去處理。而最大鑊係現屆政府公信力持續低迷，問責官員亦欠政治能力面對公眾，值得留意是常秘政務官集體消失，教育局及商經局兩個常任秘書長無影，任得兩位蛋散局長出醜。
其實𠵱家政治玩法經已改變晒，任何一班素人唔使經政黨、外國勢力或是港台《蘋果》聯手策動，只要抓到矛盾點及時機，就可以發起「維權」行動，相反政客不論泛民、建制、政府均落後於形勢，2017政改爭議演化成79日佔領運動，已經係最佳例證，連三子都無法帶領及終止素人行動。可憐689及其背後勢力，仲停留在1989年6月4日，以教協、支聯會及民主黨為重點打擊封殺對象，最終只會不斷誤判，而管治更江河日下。
添馬男