但凡國際級大賽，既跑馬亦要講吓師傅，你睇莫雅就知，呢位天下第一高手，這天做咗沙田馬場主角，佢先在第四場夥拍岳伯仁「高地之舞」首奪香港瓶，跟手再於第七場策騎日本代表「滿樂時」，以驚世騎功逼出該駒後勁，單Win4.1倍，3揀1（組合獨贏）A2派19.5元，勝出地區（組合獨贏）C2派34.5元。莫雅取得個人首次香港一哩錦標勝利。
「滿樂時」賽績超勁，乃日本一哩怪獸，賽前已被譽為日本今年來港國際賽最強成員，果然唔係猛龍唔過江，以王者姿態勇奪香港一哩錦標，兼且今年六戰六勝，連贏三場國際一級賽，包括日本安田紀念賽、日本一哩冠軍賽及香港一哩錦標，成功以不敗之身邁向2016年。
日本對上一次揚威國際賽，係前年以「龍王」捧走香港短途錦標，至於勝出香港一哩錦標，更已經係05年由柏兆雷策騎「三連冠」，可謂一搔十年之癢。今季日本準冠軍練馬師堀宣行，亦告憑「滿樂時」破天荒首次在港贏馬。
今場賽果對主隊而言可算係一場悲劇，「大印銀紙」跑盡都係第二，港隊連勝九屆香港一哩錦標後斷纜，馬主潘蘇通這天先後在香港短途錦標「大運財」及一哩錦標「大印銀紙」屈居亞軍。
上屆香港一哩錦標盟主黑衣巨人「步步友」近排輸開有條路，繼上次馬會一哩錦標大熱跑第三後，今場再撻Q獲相同名次，直路走番外叠私家路，不過唔夠「滿樂時」同「大印銀紙」衝只得第三，多少與賽前曾經輕微不良於行有關，第四名由法國雌馬「重大機密」後上拎到，四重彩派二萬蚊鬆啲。
莫雅賽後說：「『滿樂時』上仗日本一哩冠軍賽由我贏得出色，已經留給我很深的印象，今仗出戰香港一哩錦標，當我策騎牠去閘廂時，馬兒很放鬆，結果真正競賽時交出凌厲的走勢，最後200米轉腳衝剌及鬥心均強勁，贏得出色。」