會計界立法會議員梁繼昌Kenneth前日喺立法會開帳委會聆訊會議期間，恤衫同牛仔褲懷疑沾上糞便物體（圖），「屎無前例」驚動各方，同時令兩大名牌「失守」，皆因佢當時着嘅褲係Hugo Boss，恤衫就係Agnès b.，兩件名牌衫褲已被送往化驗所，料今日有結果。Kenneth話兩件衫褲注定報銷，但唔記得買咗幾錢：「兩件嘢攞咗去化驗，個迹咁耐，三、四日喎、冇得洗啦。」
否認「攬屎上身」
對於自由黨張宇人質疑Kenneth踩屎至開會時先發現，Kenneth強烈否認「攬屎上身」，指未開帳委會聆訊講廚餘問題前，早已喺另一間房開咗45分鐘內部會議，其間仲出出入入，半點臭味都聞唔到，所以一定喺帳委會聆訊中招，而且佢當日係揸車返立法會，更無可能喺中途中地雷。
八方見到Kenneth當日開會時，一邊手執佢囝囝個飯盒，一邊講廚餘問題，嘩，個飯盒有冇受污染先？Kenneth笑稱飯盒喺枱面、「嗰啲嘢」喺枱底，所以飯盒絕對安全乾淨，囝囝可以繼續用。