信置（083）主席黃志祥三位公子黃永光（Daryl）、二仔黃永龍（David）同細仔黃永耀（Alex）近年已經前後腳加入公司幫阿爸手，當中加入公司最耐嘅Daryl職位做到最高，亦都算係最勤力嗰位，𠵱家已經可以帶住細佬做嘢。
37歲嘅Daryl加入信置超過10年，𠵱家係公司執董，差唔多每次公司旗下新盤開價、賣樓、甚至係開放示範單位，佢都會落售樓處幫手，出現頻率相當之高。好似就快賣嘅西貢新盤，噚日星期日都見到佢着晒成套西裝，戴條幸運紅色領帶，掛住四萬笑容喺售樓處四圍走。
Daryl以前喺售樓處，多數低調跟住公司高層學嘢，𠵱家佢就越來越在行咁款，噚日直情帶住細佬Alex向啲準買家介紹樓盤，轉頭又跟地產代理高層密斟，黃志祥應該好放心喇。