這天跑到戲肉第八場2000米香港盃，賽果終於揭盅，大贏家係東洋大軍，憑武豊座騎「榮進之光」及莫雅的「新紀錄」包辦前兩名，頭馬獎金1,425萬，亞軍550萬，合共約2,000萬。此賽一連兩屆均由同一地方包辦連贏，上屆頭兩名分別是港隊的「威爾頓」及「軍事出擊」。
連同第七場以「滿樂時」揚威香港一哩錦標在內，日本隊今屆勝出最高獎金的兩項香港國際賽，單係呢兩場頭馬已經捧走2,700多萬港元獎金，絕對係大豐收的一天。
國際賽歷史上，日本之前以2001年最威，當年憑「愛麗數碼」、「榮進寶蹄」及「黃金旅程」包辦香港盃、一哩錦標同香港瓶，今年雖少一Win，但於香港盃包Q，整體成績仍非常突出。
訓練「榮進之光」的坂口正則現年67歲，是今年國際賽最年長練馬師之一，呢次亦係佢首度在港贏馬，而日本46歲老將武豊則是繼01年「黃金旅程」後再贏香港國際賽。
「榮進之光」喪放不斷，竟仍勝一身位，在日本這叫「大逃」戰術，此駒連同今仗11戰9勝，四歲馬今場單Win有38倍，組合獨贏3揀1開A3則派23元，勝出地區則開C2派49元。
莫雅係今屆國際賽騎師大贏家，憑「高地之舞」及「滿樂時」包辦完香港瓶同一哩錦標後，於香港盃騎另一日本代表雌馬「新紀錄」後追第二。香港盃主隊「將男」及「威爾頓」拼盡只分別跑第三及第四，後駒衛冕落空，上屆亞軍「軍事出擊」退步至第六名，今場四重彩派五萬八千幾蚊。