成立41年嘅廉政公署ICAC首度舉辦標語及標記創作比賽，畀市民發揮創意以唔超過30字（唔包括標點符號）嘅標語，表達肅貪倡廉意見。八方之前都話過，如果ICAC搵收咗澳洲公司5,000萬嘅特首梁振英做標記，肯定有極佳宣傳效果，估唔到網民同八方心意一致，大量以CY為主題嘅標語已經湧現！
fb專頁遭網民洗版
廉署青少年網站「iTeen大本營」嘅facebook專頁ITeen Xtra，日前宣傳廉署嘅標語及標記創作比賽，呼籲網民「用你嘅創意，話畀呢個世界知：廉潔，對你的寓意是甚麼？」
網民結果紛紛留言獻計，但幾乎全數以梁振英收咗澳洲企業5,000萬、但廉署冇調查為創作主題諷刺一番，例如「反貪污，捉貪曾；倡廉潔，拉狼英」，「踢走六八九、打貪不留手、倡廉要恪守、香港先有救」，唔少網民畀like兼笑廉署捉蟲。
《100毛》：引人寸你？
《100毛》嘅facebook專頁就衰衰咁話：「根本就裝個局引人寸你（廉署）嘅喂？」面對挑機嘅廉署ITeen Xtra喺facebook專頁以標題〈巧京京……話你報錯怕你嬲〉回應，話網民唔應該只喺facebook專頁留言，應正式到參賽網址報名，唔通廉署都好想相關CY嘅標語勝出，覺得可以喺宣傳谷一谷？
李八方
mailto:[email protected]