瑞銀每年臨近聖誕都舉行角色扮演派對，並捐出一整日嘅交易佣金做慈善，今年派對喺上周五舉行。年年都積極參與嘅衍生工具部，今年揀咗有型有款嘅《變種特攻》去扮鬼扮馬，阿頭于正人（Johnny）舊年扮完《魔雪奇緣》入面隻雪人Olaf，今年戴住副黑超扮隊長雷射眼，chok番次。
Johnny兩位靚女同事李靄欣（Anita）與卓素華（Winni），就變身好冷傲嘅暴風女神同羅剎女，大家全部扮cool，板起塊面影相，似模似樣。
除咗要絞盡腦汁搵角色扮演，各部門都會諗啲新意思去籌款。Johnny一組人今年除咗呼籲各同事捐出散紙外，仲好有創意咁，度咗個「麻雀話事啤」，叫同事以100蚊或200蚊買一隻麻雀，配對大牌，贏出嘅同事獲得一副麻雀，呢個遊戲籌到兩萬大元。