北京上星期深受霧霾影響，上周一更發出首個最嚴重嘅重污染紅色預警，財爺曾俊華咁啱喺上周二跟財經事務及庫務局局長陳家強，仲有金管局總裁陳德霖一齊訪京3日。財爺話，去到北京一落機就察覺到空氣中有陣微焦味，但當局預測非常準，預計污染維持3日以上，到佢哋行程最後一日，果然放晴，空氣亦好咗！
其實佢哋呢個財金組合，每年底都會訪京一次，以往通常喺11月初，今年因夾時間而遲咗，撞正嚴重霧霾。財爺喺網誌透露，以前去北京都遇過霧霾，今次情況的確比較嚴重，周圍灰濛濛，街上亦明顯少人。
佢哋訪京主要拜會內地財金官員，包括財政部、商務部、中證監、保監與銀監，仲首次拜訪中國銀行業協會，事關總理李克強上月喺東盟與中日韓領人會議上倡議成立「亞洲金融合作協會」，財爺順便向中國銀行業協會了解呢個新協會籌備成點，果然識做。