只要贏過國際賽，到咗呢期，總會對凱旋時刻萬分懷念，就算於四場正本戲冇馬出，都梗想喺同日其他本地賽事重溫好夢，在潘頓嚟講，上年以「友瑩格」威風八面，呢期又有「多名利」、「櫻花福音」及「軍事出擊」爭其中三項國際賽，不過「友瑩格」養傷冇份參戰，潘頓固然耿耿於懷，但佢同場總叫做有「櫻花福音」頂替好過冇，相反「友瑩格」馬主楊毅錯過衛冕機會，心情難免若有所失。
不過唔緊要，楊毅另外有隻又得團體名下馬「比卡超」列陣第六場二班1600米，那管二班賽與一級賽有好大分別，但贏到一樣可以感受大賽日氣氛，卡士、獎金低啲又有乜所謂？
今季「比卡超」三戰1400米，分別用霍勵賢、史卓豐、郭能都追番一段跑得接近，偏偏今次寧願初配潘頓，而上季騎呢匹馬兩勝嘅郭能都要坐冷板櫈，似係楊毅從中拉線，希望「比卡超」一如「友瑩格」，重溫與潘頓喺國際賽合作贏馬美夢，所以今場配搭調動，絕對係經過深思熟慮。