睇台灣跑步網，大家都心傷阿輝又落選嘞……其實唔奇，個個對手都係全職跑手，佢平日仲要打份朝九晚五，練習時間少，每周跑嘅里數都冇全職嘅一半，落選原本係好合理嘅，都話跑步冇奇蹟㗎啦！
講緊嘅係28歲嘅川內優輝，佢之所以係最多人留意嘅日本長跑選手，並唔係佢跑得最快。其實阿輝代表日本比賽冇乜成績，亦唔係名將之後，冇名牌教練、冇公司贊助、冇靠山；佢又唔係特別有型，跑姿亦唔正宗，差不多每張影到阿輝比賽嘅相，都係面容扭曲、狀甚痛苦嘅。
阿輝冇乜特別賣點，多人留意係因為佢場場都跑到好似熱鬥小馬就嚟死咁，但次次唔死得不特止，仲跑贏好多姿態優美嘅職業對手。日本人鍾意鋤強扶弱，就當佢係奇蹟創造人，仲叫佢做「市民跑手」；唔贏就合理，贏就當係人民勝利咁滯，同此時此刻嘅港足有啲似，都係民族英雄feel！
阿輝自細多得阿媽帶佢幾兄弟去跑步，讀書時代都有代表學校參加箱根驛傳（日本大學長跑接力賽），不過又唔係最標青嗰班，所以大學畢業後就平凡過唔平凡，去搵份政府工做……故事嚟到呢度，你都識講埋落去──返工放工結婚生仔懷緬過去常陶醉，偶爾去吓旅行一年跑一次10K就算對得自己住，。
阿輝唔buy呢一套，佢唔想咁就一世。佢明知自己練得唔夠多，就決定用比賽當高強度練習，高𥧌期可以每個禮拜都有比賽，淨係今年佢跑咗10幾個馬拉松、廿幾個半馬，周周跑，次次跑到死去活來，然後星期一又若無其事打呔返工去！
今年嘅馬拉松，阿輝攞咗三個冠軍，11月嘅紐約馬拉松攞第六係亞洲第一；可惜上星期喺福岡關鍵嘅奧運資格賽，阿輝失手跑第八，喺日本選手之中跑第四，仲未攞到奧運入場券。四年前佢入選唔到倫敦奧運，就好似櫻木花道咁剃光頭；今次唔使剃住，因為出年年頭仲有兩個馬拉松畀佢搏，希望阿輝最後唔會變成馬拉松界嘅三浦知良啦！
KEYMAN
節目主持
電郵：[email protected]