堂堂香港立法會咁莊嚴嘅地方都出現糞便，玩屎又真係幾奇；意甲球隊拉素呢排沉到爆，聯賽六場未贏過，排名跌到去12位，50名拉素死忠球迷上周五就拎10袋動物糞便擺喺練習基地門口，要請球會主席洛迪圖慢慢品嘗。
聯賽六戰一分遷怒班主
拉素近六仗聯賽得一分咁大把，包括首都打吡吞羅馬雙蛋，排名由最高第三位已經跌至第12位，雖然喺上周中歐霸盃打和聖伊天首名出線，但球迷嘅怒火仍然未平息，上周五就有為數約50位拉素球迷去到基地門口請洛迪圖「食屎」。其實拉素球迷今次都係抄羅馬球迷條橋，之前羅馬表現不濟，就有球迷送幾箱紅蘿蔔去基地門口，話佢哋係兔仔；兔仔喺意大利其實係懦夫象徵，唔知係唔係有刺激作用，羅馬假假地都喺歐聯晉級。
拉素迷今次就去得更盡，送10袋動物屎去練習基地門口，仲拉晒橫額話對洛迪圖忍無可忍，叫佢食晒啲糞便，又大叫一系列反洛迪圖口號就和平散去，可憐一班清潔工人要執手尾。講真拉素真係唔抵幫，教練皮奧利已經鬧過班球員態度唔好，中場大將碧基亞都傳心淡，想明年一月轉投國際米蘭；周一拉素喺聯賽主場對森多利亞再反唔到底，球迷唔知又會請洛迪圖食咩呢？