要數今季最合拍騎練，呂健威與柏寶可謂當之無愧，兩人今季在草地賽事合作九次，取得五冠三亞佳績，僅一次唔入Q，今期國際賽屬一年一度盛事，呂廐將一對新勝馬「幸運如意」及「英明勇將」齊齊續配柏寶上陣，有力替騎練在大賽日攞威。
「幸運如意」今季兩戰全勝，而且贏來不費吹灰之力，仲有幾多喺手仍是個謎，同日有贏馬路程二班1200米唔報，卻選擇增程角逐一班1400米，一來唔使負重磅，二來計血統此程必可勝任，相信幕後應已計過度過才作此部署，勿因欠路程根據而睇輕。
此外，「英明勇將」上仗在港首次上陣即勝，更是呂廐近十年首匹一出即贏之自購馬，破格份子必擁過人之質，既然蹄下敗將「威廉之子」再出已贏馬補中，前駒留在三班再跑新勝路程，當然有機會再下一城。