沙田馬場一年一度國際大賽今日舉行，沙田馬場內定必萬頭攢動，熱鬧非凡。每有國際大賽，世界頂級騎師就會來港獻技，12月9日星期三晚上快活谷有國際騎師邀請賽，左丁山見到世界冠軍愛爾蘭人莫雅的功力，真係神乎其技，攞到冠軍獎嘅南非騎師雷景勳發揮馬匹後勁，確係一絕，攞季軍嘅日本騎師戶崎圭太亦令人眼前一亮，比以前來港嘅日本冠軍武豐好得多喎，點解依家先至嚟呢？問肥仔K有何理由，肥仔K話係日本賽馬分全國與地方賽馬兩大陣營，戶崎出身於後者，係比較難以出頭嘅，一時之間難以說得清楚，但從資料數字睇，及12月9日嘅實際表現睇，戶崎的確係一級騎師，不容忽視。
今年日本馬好重視香港國際大賽，有十匹咁多來港；唔會全部空手而回啩，肥仔K叫左丁山特別留意莫雅策騎嘅第七場香港一哩賽2號「滿樂時」及第8場香港盃14號「新紀錄」，第三選日本馬係第五場香港短途錦標14號「真誠少女」，由戶崎圭太策騎。佢話呢三隻馬都有資格爭冠。
逐場睇吓吖。第四場國際一級賽2400米香港瓶，1號「富林特郡」係上屆冠軍，應屆法國凱旋門大賽季軍，誰人殺馬，要先過此關，不過騎師湛明諾稍弱，係一點瑕疵，13號「大利盈」嘅母親「大利來」於2004年贏過香港盃，本身係大長途馬，三歲馬初出就跑2000及2400米贏馬，配蘇銘倫有威脅，12號「明朝盛世」更誇張，至今跑過五場都係2400米，贏咗四場，配李寶利唔睇唔得，配腳還有2號「天鷹翱翔」，7號「喜蓮之星」。
第五場香港短途錦標跑1200米，香港馬有1號「大運財」，6號「幸福指數」爭奪冠軍，日本馬有14號「真誠少女」戰績驕人，可加入戰圈，配腳選2號「獨掌全權」。 第七場香港一哩錦標1600米，香港馬王「步步友」1號，必定係大熱門，今次不容有失，香港馬有7號「詠彩繽紛」及3號「美麗之星」可爭配腳，最可以威脅「步步友」嘅係日本馬2號「滿樂時」，呢隻馬今年5戰全勝，係千六米專家，配莫雅「人強馬壯」。第8場全日戲肉香港盃跑2000米，上屆冠軍「威爾頓」已不復威風，上屆亞軍「軍事出擊」已經七歲，未必可以一Q返嚟，呢場會幾亂吓，爆冷唔奇，呢場有四隻日本馬，點會隻隻坐飛機嚟香港遊馬河呀？不如用今年在澳洲三次一級大賽都跑入三甲嘅4號「模範駒」做膽，拖1號「威爾頓」，5號「軍事出擊」，8號「佳力印記」，14號「新紀錄」，7號「善得福」。香港馬上屆國際賽四場贏三場威風八面，今屆只剩番「步步友」衛冕千六米較有把握，日本馬來勢洶洶，不可不防。