【專題籽：人言無畏】
最搞笑的香港男演員，我覺得唔係周星馳，而係許紹雄搭周驄。《新紮師妹》內「方鍾Sir」呢個笑位，睇十次，笑廿次。警察許紹雄為了令黑幫大佬周驄相信自己真的叫方鍾Sir，於是寫了個中英夾雜的"Sir"字，原來是由編劇之一的陳詠燊「腦作」。因為荒誕，所以難忘。小人治港，蠢才當道，他認為香港現在是本Sir字典，膠事常出現，離奇過小說，更說以他功力，絕對編唔出咁反智、咁惹人𠝹凳的劇情。望住個Sir字，我忽然笑唔出。
只要你把大話講到似層層，就會有！人！信！戲中，周驄看到那個Sir字，還謙遜地說：「真是活到老學到老！」現實很多周驄，可惜沒那麼可愛。他們有個外號，叫真心膠。政府把謊言加層糖衣，loop兩loop，他們就信，五毛都不用付。佔領便是真暴民，發展就是硬道理。陳詠燊說：「Sir字尚算係情理之內、意料之外嘅設計，但香港𠵱家係情理之外、意料之外，嚴重N倍。我以為嚟我facebook留言鬧我嘅人都係五毛，後來去睇佢哋嘅頁面，先發現有啲根本係正常人，咁先驚。」
「寧願輸畀梟雄，唔想輸畀狗熊」
自己屋企俾政府搞成咁，當然要寫，他的時事帖文有發洩有提醒，主要是不忿官員當大家弱智，「你要溫水煮蛙，你估香港人唔知咩？坦白講，好多香港人為咗錢，真係願意讓步，但至少你要留顏面畀我。民憤咁大，正因為你真係當我哋係儍的嗎。我們寧願輸畀一個梟雄，都唔想輸畀一群狗熊。」為官的、議會內的，很多大聲夾冇準，都「明張目膽」表演思歪把戲，「佢哋實在講太多連儍人都覺得有問題嘅對白，反國教有人叫吳克儉落台，樹根話咁同焚書坑儒有乜分別，元秋又話飲東江水要感恩，仲有『三條跑道總好過兩條跑道』同慈母論等。政府想管理好呢個地方，你一係同我哋好好地傾，一係你請幾個勁嘅編劇將啲對白寫到冠冕堂皇，否則你咪搞啦！」看到膠官輪流獻世出醜，他亦想用周星馳式對白反問：「做乜箒你」。
問題係，無論你講幾多次，白眼反到後腦都好，我們還是奈佢唔何，然後習慣硬食，「現在香港令我最嬲嘅係『荒謬疲勞』正在蔓延，荒謬事情太多，大家都慣咗。應憤怒嘅人，變成覺得係咁㗎啦，冇辦法㗎喎，即係傳說中嘅『膠』都費事派，然後香港就會變成恐怖嘅死城。我做咗咁多年香港人，未見過好似𠵱家咁嚴重。」有班香港人在自說自話，自鳴得意，好像有個平行時空；又或者我們正在一齣荒誕劇之中，個個都喺度扮嘢，但演技又好屎。
如果我是陳詠燊，會有點無奈，因為本來他在facebook多寫愛情散文，輕輕鬆鬆，可是那些針砭時弊的帖文贏得更多like及share，「我梗係想大家like我寫嘅愛情post，因為愛情先可以賣書嘛！」可是生於亂世，文人好像都有點責任，像魯迅、像胡適，「厚顏承認自己都叫識寫幾隻字，係有責任導人向善，文以載道。」所以他淺白地寫政治，希望影響一個得一個，「影響到一個都係一個功德，等佢做香港人嘅戰友都好吖！」
他說香港是一齣中段失了控的勵志片：主角隊友不合群、對手比想像中強很多，如何收科？「我哋唔好只係將努力放喺排兩個鐘、慳$22.5買雪糕，而係燃起心中團火去抗爭。」他提到電影界前輩曾對他說：「講和首要係我比你好打，如果我唔夠你打，我是來求饒。」我要真和諧，唔係假河蟹的話，人民的力量一定要壯大，取回平衡，那齣荒誕片才會落幕，勵志片才能真正的勵志。
記者：葉青霞
攝影：劉永發
編輯：陳國棟
美術：孔文彬